El viaz

 

Dopo do mesi e tre dì de paura, mancanza de conforto, malatie e tuta la sort de privazion che se pol maginar nen viaz transoceanico, fat en quel temp en bastiment a vapor, enfin l’ America! Nel prim de otobre de 1875, el Belgrano è rivà al Rio de Janeiro, con la carga de imigranti francesi e taliani. En mez a quei, ghera candido Nicolò Pintarelli, con 29 ani de età, compagnà de la so sposa Maria Cattarina Anderle, con 27 ani, e de la fiola Cattarina Fortunata, che gaea sol do ani de vita. El long viaz è sta inizià nel tren che è partì de la cità de Trento, al nort de la Italia, nel 28 agosto de 1875. Dopo traversar el tunel (en bus nela nomtagna) che liga la Italia al sul de la Francia, ei è passadi a Paris e rivadi a Havre. De là ei è partidi nel bastiment ai doi de setembre. Ei ha fat scala a Lisbona e ai sete de setembre ei ga continuà en direcion al Brasil. Naltra scala, sta volta en la Bahia, de endo ei è partidi ai 26 de setembre. Ei è rivadi a Rio de Janeiro nel prim de otobre. Ai sete de otobre ei è nadi avanti, naltra volta de bastiment, con scala a Santos(SP), rivadi enfin al porto de Itajaí (SC).

De là, en carreta per na distanza de 42 km, ei è rivadi a Blumenau (SC), endo ei è stai provisioria- mente  alogiadi en  barraconi. Dopo na selezion, ei è nadi avanti a pè, per 47 km, e dopo passar per Timbò (SC), finalmente ei è rivadi nela Colonia Caminho de Rodeio. Strachi, ei è rivadi ai 28 de otobre de 1875, per ciapar posse del lote 116, de dozento mili metri quadri, che ghe è sta destinà per el Impero.