El inizio

 

Con Fede, gran coragio e le poche robe che ei ga podest torse dre da l’ Italia, el bisnono Candido e so sposa Catherina ei se ga meti a “far la America”. Questa era la oportunità de gaer en toc de terra de so proprietà ( tut suo! ), per arlevar la familia e realizar ei so sogni. Nela pratica, bisognea subit atacar la foresta tropical, piena de animai selvagi e feroci e sirache velenose, senza parlar dei Bugheri, (ei Indii Xokleng), così stragna per lori, e farse su el prim coert o ranciòt. Con l’ aiuto de 329$920 (trezento e venti nove mili e novecento e venti rèis) dadi dal Impero, Candido se ga comprà arquante ferramente e mantimenti. A colpi de facon e manara el ga davert for en spiaz e trat su na cabanota, fata su con legni bruti, scoerta de foie de palmiti, su la riva del fiume che fea divisa a oest de la so proprietà. El la  fat su na casetela alta, sora colone de legn, per meterse a salvo dei animai che girea entorno a la nova casa. El contea sempre che era normal scoltar for per la not spaurosi urli de la tighera. En vicin ben intenzionà la tentà avisarlo che ghera qualcos de sbaglià a costruer lì en quel posto. Ma, per no cognosser la lengua, no  ghè sta entendiment tra de lori. Arquanti dì dopo è vegnù na piena, roba ben comum nela val del Itajai. Candido e la so familia ei se ga fermadi su el su alt de la ca e ei è stai salvi dal vizin cola so batera o barcheta. Tut stremì, la refat su la so ca en poc pu en sù. Ma, el se ga sbaglià naltra volta!

Naltra piena, encor pu alta che la prima, ga invadì so casa naltra volta. Candido no se ga desperà. La refat su la ca encor pu lontan del fiume, nen terreno pu alt, nel posto endo la ghè sin encoi.